وجه إبراهيم حسن، مدير منتخب مصر الأول لكرة القدم، رسالة شديدة اللهجة إلى منتقدي شقيقه حسام حسن، المدير الفني للفراعنة، داعيًا إلى الكف عن الهجوم المستمر على الجهاز الفني وعدم التقليل من الإنجازات والنجاحات التي حققها المنتخب خلال الفترة الماضية.
وجاءت تصريحات إبراهيم حسن عبر سلسلة من الرسائل نشرها على حسابه الشخصي بموقع التواصل الاجتماعي “فيسبوك”، حيث دافع بقوة عن الجهاز الفني، موجهًا انتقادات لاذعة لبعض الإعلاميين وبعض زملائه السابقين في الملاعب، ومعتبرًا أن هذا الهجوم المنهجي يفسد فرحة الجماهير المصرية بما يقدمه المنتخب.
وقال مدير منتخب مصر في رسالته: “اتقوا الله في مصر، ليه عايزين تكسروا فرحة الناس الطيبة والأطفال اللي رجعوا يحفظوا تيشيرت وشعار منتخبهم وألوان علم مصر؟ اسألوا المصريين المغتربين عن أطفالهم اللي كانوا قربوا ينسوا ألوان وشكل علم بلدهم، افتكروا لمة الشعب وفرحتهم أثناء وبعد كل مباراة، افتكروا احترام العالم كله لمنتخب مصر”.
وأضاف منتقدًا الأجواء المحيطة بالفريق: “ليه الغل من زمايل لينا كنا بناكل في طبق واحد، وكنا حاملين شعار واحد وهو علم مصر؟ ليه الغل من معظم الإعلاميين والحرب والهجوم غير المبرر في كل صغيرة وكبيرة، والتقليل من أي نجاح بنعمله؟ ليه بنكبر الصغير على الكبير وبننسى الأصول اللي الشعب المصري متربي عليها؟”.
وسلط إبراهيم حسن الضوء على تفاني شقيقه في عمله، قائلًا: “افتكروا حسام حسن المخلص والمحب لبلده، اللي بينتحر علشان يفرح بلده، من منا بلا أخطاء ولا ابتلاء في حياته؟ ورغم كل ظروفه الخاصة، عند شغله واسم بلده بيفصل وبيرمي كل حاجة ورا ضهره، ليه يتحارب بالشكل ده عند كل موقف؟ ليه قبل كل معسكر بتتعلن علينا الحرب الشرسة دي؟”.
واختتم إبراهيم حسن رسائله بتوجيه نصيحة للمدربين المحليين الذين يطمحون في قيادة المنتخب قائلًا: “نجاحنا أنا وحسام هو اللي هيديك الفرصة بعد كده تبقى موجود مكانه، علشان اللي بياخد القرار يبقى مطمئن من تجربتنا ويديك فرصتك وما يخافش، وننسى الأجنبي، لكن لو أنا فشلت مش هتجيلك”.
