كشفت الفنانة والراقصة دينا العديد من الأسرار والتفاصيل الشخصية والمهنية، مؤكدة أنها لم تشرب البيرة قط، وكشفت عن محاولتي انتحار، معبرة عن أمنيتها أن يتذكرها الناس بعد وفاتها بصاحبة مدرسة رقص.
وقالت دينا: “قبل ما أبدأ وصلة الرقص بقول اللهم خير حافظا وهو أرحم الراحمين من أمامي ومن خلفي ومن يميني ومن يساري ومن تحتي ومن فوقي، وبقول أدعية تانية ، لأن ممكن نلجأ لمين غير ربنا؟
هو أحسن حاجة في الحياة”، مضيفة: ” أنا بحب ربنا وفي بيني وبينه علاقة، مش واخدة الدين من منطلق إني لقيت نفسي مسلمة لازم أبقى مسلمة” .
وأوضحت: “أنا بتعامل مع نيتي لربنا، أنا مبعملش معصية، النية من جوا مفيهاش معصية، وأنا حتى لو مرقصتش كنت هلبس عريان، كنت هرتكب نفس الحرمانية مش هتفرق”.
وكشفت دينا : “في عندنا قيود غصب عننا اتربينا عليها، أنا برقص أه لكن في حاجات مش بقدر أعملها، كانوا بيقولوا إنك تاكلي لبانة عيب ولحد دلوقتي مش باكل اللبانة”، مضيفة : “والدي مكانش عنده مشكلة إني أرقص في فرقة فنون شعبية، لكن لما رقصت لوحدي اتخانق معايا وقاطعني سنتين “.
واعترفت دينا بأنها تزوجت 9 مرات، قائلة: “أسعد لحظات حياتي وأنا مش متجوزة”، ووصفت الزواج الخامس من سامح الباجوري والد ابنها علي بأنه “كان أكتر راجل احترمته وفهمته وفهمني وحبني، واستمر سنتين لأنه مات بعدها”.
وعن الزواج، قالت:” الزواج لو يبقى بعقد مؤقت يتجدد كل سنتين يبقى زي الفل، أنا بهزر بس بقول الحقيقة الناس بقت بتزهق بسرعة”.
وكشفت دينا عن محاولتي انتحار، قائلة: “مرة وأنا عمري 15 سنة بعد ما واحد كنت بحبه انتحر، قطعت شراييني، ومرة تانية كنت مخنوقة وشربت دواء ولحقوني، وكان السبب إني عايزة أتطلق من حد وقالي إنه هيدمر مستقبلي فقررت انتحر”، مضيفة : “اللي بيخوفني هو الفراق بيأثر فيا أوي وعشته كتير، جوزي أبو أبني وأبويا فراقه كان صعب أوي، وفقدت معاه سري ، لأن سري مقدرش أقوله لحد”.
وعن فترة كورونا، قالت: “كانت صعبة جدًا تعبت، قعدت 21 يوم في البيت ومنهم 10 أيام درجة حرارتي 40، ابتديت اكتب وصيتي وكتبت كل اللي بامتلكه عشان ابني يعرف ، ومكنتش بفكر غير في ابني، كان هو اللي مخوفني إني أمشي”.
وكشفت عن تجربة مؤلمة في طفولتها قائلة: “كنت بشيل دبوس وأنا بركب الأتوبيس عشان التحرش، أي حد يقرب مني أضربه فيه”.
وعن حبها للرقص قالت : “أنا برقص في أي حته حتى في الشارع، أنا بحب الرقص في أي وقت، أكتر وقت ببقى حاسة فيه إني حرة وأنا برقص “.
وقالت دينا: “معملتش شد وجه، عملت مناخيري، وعمري ما عملت عملية تجميل في جسمي”، مضيفة : “أنا بتمرن كتير جدا وبروح الجيم 3 مرات في الأسبوع، ونص الأكل مش باكله، مش باكل دقيق ولا منتجات الألبان ولا فراخ “.
وعن الراقصة سهير زكي، قالت: “قابلتها في حياتي مرات، هي أستاذة في الرقص، عندها طريقة رقص ليها مدرسة، مشيت بهدوء لأنها سابت الفن بهدوء”.
وعن الموت، قالت دينا: “مش بخاف من الموت لأني بحب ربنا وعايزة أروحله، واليوم دا هيكون يوم فرح”، مضيفة:” لو قالولي إن بكرة آخر يوم في حياتي هقعد أصلي طول الوقت وأدعي، مش هعمل أي حاجة في الدنيا لأني رايحة للامتحان”.
واختتمت تصريحاتها قائلة: “نفسي يفتكروني لما أموت إني صاحبة مدرسة رقص، أنا بدرس في العالم كله من سنين طويلة”.
دينا, محاولة انتحار, تزوجت 9 مرات, الرقص, كورونا 21 يوم, مدرسة رقص